ក្លិបបាល់ទាត់នៅខេមបូឌានព្រីមៀរលីគរដូវកាល ២០២៤/២៥ គឺព្រះខ័នរាជស្វាយរៀងនឹងត្រូវបើកទ្វារកីឡដ្ឋានមរតកតេជោ នៅថ្ងៃទី១០ ខែឧសភា ដើម្បីទទួលក្រុមភ្ញៀវ FC ARKADAG ដែលជាក្លិបមកពីតំបន់អាស៊ីកណ្ដាលគឺប្រទេសតួកមេនីស្ថាន ក្នុងវគ្គផ្ដាច់ព្រ័ត្រក្នុងពានរង្វាន់ AFC Challenge League រដូវកាលឆ្នាំ ២០២៤/២៥ ។

បើសិនជា ព្រះខ័នរាជស្វាយរៀងក្លាយជាម្ចាស់ជើងឯក ពានរង្វាន់ក្លិបអាស៊ីលំដាប់ទី៣នេះ ព្រះខ័នរាជស្វាយរៀងនឹងទទួលបានទឹកប្រាក់ ១លានដុល្លារអាមេរិក និងធានា១កៅអីកន្លះ ទៅលេងនៅពានរង្វាន់ AFC Champions League Two សម្រាប់រដូវកាល ២០២៥-២៦។

នេះមានន័យថា នៅរដូវកាលក្រោយឆ្នាំ ២០២៥/២៦ ក្លិបព្រះខ័នរាជស្វាយរៀង នឹងទៅលេងវគ្គចែកពូលនៅក្នុងពានរង្វាន់  AFC Champions League Two និងមួយក្រុមទៀត(ក្រុមជើងឯករងនៅលីគកម្ពុជា ឆ្នាំ២០២៤/២៥) នឹងទៅលេងនៅវគ្គជម្រុះក្នុងពានរង្វាន់ AFC Challenge League រដូវកាល២០២៥/២៦ ដែលនេះជាសមិទ្ធផលដ៏អស្ចារ្យ សម្រាប់វិស័យបាល់ទាត់នៅក្នុងប្រទេសកម្ពុជា។ ប៉ុន្តែបើសិនជាព្រះខ័នរាជស្វាយរៀងក្លាយជាជើងឯករង ពួកគេនឹងទទួលទឹកប្រាក់កន្លះលានដុល្លារអាមេរិកតែប៉ុណ្ណោះ។ ហើយក្រុមនេះ នឹងត្រូវទៅលេងវគ្គជម្រុះ ពានរង្វាន់ AFC Challenge League រដូវកាល ២០២៥-២៦ ជាថ្មីម្ដងទៀត។ 

គួររំលឹកផងដែរថា FC ARKADAG ដែលជាគូប្រកួតក្នុងវគ្គផ្ដាច់ព្រ័ត្រពានរង្វាន់លំដាប់ទី៣អាស៊ីនេះ AFC Challenge League 2024/25 នេះគឺបង្កើតឡើងនៅថ្ងៃទី១ ខែឧសភា ឆ្នាំ២០២៣ ពោលគឺមានអាយុទើបតែ ២ឆ្នាំប៉ុណ្ណោះ ។ ត្បិតក្លិប FC ARKADAG មានអាយុក្មេងខ្ចីពិតមែន ប៉ុន្តែក្លិបនេះអាចគ្រងតំណែងជើងឯកលីគកំពូលតួកមេនីស្ថានទាំងពីររដូវកាលចុងក្រោយ គឺរដូវកាល ២០២៣ និង ២០២៤៕