ការប្រកួត អុី-ខេមបូឌានព្រីមៀរលីគ រដូវកាល ២០២៥/២៦ នឹងចាប់ផ្ដើមជាផ្លូវការ នាពេលឆាប់ៗខាងមុខនេះ បន្ទាប់ពីកម្មវិធី eCPL grand opening កាលពីថ្ងៃទី១៣ ខែតុលា ឆ្នាំ២០២៥ កន្លងទៅ នៅសណ្ឋាគារត្រែប។ ការប្រកួត រដូវកាល២០២៥/២៦ នេះមានក្លិបដាក់ពាក្យចូលរួមផ្លូវការសរុប៩ រួមមាន៖ អង្គរថាយហ្គឺរ, បឹងកេត,  អាយ អេស អាយ ដង្កោសែនជ័យ, អឹម អូ អាយ កំពង់ដេវ៉ា, កងយោធពលខេមរភូមិន្ទ, វិសាខា, ណាហ្គារើលដ៍, ភ្នំពេញក្រោន, និង ព្រះខ័នរាជស្វាយរៀង ។ 

រូបមន្ត ប្រកួតរដូវកាល ២០២៥/២៦ នេះគឺរៀបចំលេងតាមប្រព័ន្ធលីគ វិលជុំជួបគ្នា២ដង ពោលគឺម្ចាស់ផ្ទះនិងភ្ញៀវ ( Home and Away ) ។ កីឡាករ ៦ នាក់ ដែលមានពិន្ទុខ្ពស់ជាងគេ នឹងឡើងទៅលេងនៅវគ្គចុងក្រោយ (Final Round) ដើម្បីស្វែងរកម្ចាស់ជើងឯក។

ការប្រកួតសប្ដាហ៍ទី១ នៃអុី-ខេមបូឌានព្រីមៀរលីគ ២០២៥/២៦ គឺជាជំនួបរវាងក្លិបវិសខានិងក្លិបកងយោធពលខេមរភូមិន្ទ, ចំណែកណាហ្គាវើលដ៍ដែលជាម្ចាស់ជើងឯករដូវកាលមុន នឹងប៉ះព្រះខ័នរាជស្វាយរៀង, ចំណែកឯ អង្គរថាយហ្គឺរ នឹងជួបជាមួយ អឹម អូ អាយ កំពង់ដេវ៉ា។ ដោយការប្រកួតទាំងនេះ ជាការប្រកួតទៅលើវិញ្ញាសាលើទូរសព្ទដៃ និង វិញ្ញាសាលើដៃហ្គេម។

គួរឱ្យដឹងថា ការប្រកួត អុី-ខេមបូឌានព្រីមៀរលីគ បានដំណើរការបាន២ រដូវកាលហើយ ពោលគឺតាំងពីឆ្នាំ ២០២៣ មកម្ល៉េះ។ ម្ចាស់ជើងរដូវកាល ២០២៣/២៤ និង ២០២៤/២៥  បានទៅលើកីឡាករ ទឹម វង្សរ៉ាវុធ ដែលជាកីឡាករតំណាងឱ្យ ក្លឹបណាហ្គាវើលដ៍ ៕