ការប្រកួត ខេមបូឌានព្រីមៀរលីគ ឆ្នាំ២០២៥/២៦ កាន់តែកក្រើកក្នុងសប្តាហ៍ទី២២ នេះ ។ បច្ចុប្បន្ននេះ យើងបានរកឃើញក្លិបចំនួនបីហើយនឹងត្រូវប្រកួតនៅជុំដណ្ដើមពាន។ ប៉ុន្តែ មានក្រុមចំនួន៤ ដែលកំពុងតែមានពិន្ទុប្រកៀកប្រកិតគ្នា ដែលនាំឱ្យមានការប្រកួតដ៏តានតឹង ពីចំណាត់ថ្នាក់ទី ៤ ដល់ទី ៧ ។ 

បើតាមតារាងពិន្ទុសប្ដាហ៍ទី២១ ព្រះខ័នរាជស្វាយរៀង, ភ្នំពេញក្រោន, និង អង្គរថាយហ្គឺរ, មានភាគរយសឹងតែមួយរយភាគរយ នឹងបានទៅលេងនៅតំបន់៦ក្រុមខាងលើ (Top6)។ ព្រះខ័នរាជស្វាយរៀង នៅតែរក្សាដំណែងកំពូលតារាង ដោយមាន ៤៨ ពិន្ទុ។ ភ្នំពេញក្រោន រក្សាតំណែងទីពីរមាន ៤៣ ពិន្ទុ ខណៈ អង្គរថាយហ្គឺរ មាន ៣៣ ពិន្ទុ បន្ទាប់ពីឈ្នះភ្នំពេញក្រោន ៤–៣ ក្នុងសប្តាហ៍ទី ២១។

តាមពីក្រោយអង្គរថាយហ្គឺរគឺ ណាហ្គាវើលដ៍ និង បឹងកេត ដែលក្រុមទាំងពីរ ៣២ ពិន្ទុដូចគ្នា។ ក្នុងការប្រកួតជុំទីពីនេះ បឹងកេត បានអស់កាលវិភាគប្រកួតហើយ ប៉ុន្តែណាហ្គាវើលដ៍ មានប្រកួតមួយប្រកួតដែលនៅសល់។ ប្រសិនជាបើ ណាហ្គាវើលដ៍ ឈ្នះ ប្រកួតបន្ទាប់របស់ពួកគេ នោះបឹងកេតមិនអាចរក្សាចំណាត់ថ្នាក់បច្ចុប្បន្នបានឡើយ។ 

ចំណែកឯ វិសាខា ស្ថិតនៅទៅតាំងទីតាំងទីប្រាំមួយ មានចំនួន២៩ពិន្ទុ។ ដូច្នេះ វិសាខា ត្រូវតែឈ្នះការប្រកួតជាមួយភ្នំពេញក្រោនជាដាច់ខាត បើសិនជាបរាជ័យ វិសាខា ប្រហែលនឹងអស់ឱកាសបន្តទៅជុំដណ្ដើមជើងឯក ។ 

យើងក៏មិនអាចរំលង អឹម អូ អាយ កំពង់ដេវ៉ា បានដែរ ព្រោះបច្ចុប្បន្ន ក្រុមនេះមាន២៧ ពិន្ទុ និងសល់មួយប្រកួត។ ទោះបីជាពួកគេនៅចំណាត់ថ្នាក់ទីប្រាំពីរ និងមាន២ពិន្ទុតិចជាងវិសាខាក៏ដោយ ក៏ក្លិបនេះអាចបន្តទៅលេងវគ្គដណ្ដើមជើងឯកបានដែរ បើសិនជាពួកគេឈ្នះការប្រកួតបន្ទាប់ ហើយវិសាខា ចាញ់ប្រកួតបន្ទាប់ និងការគណនាផលសងគ្រាប់បាល់ និង ប្រវត្តិជួបគ្នា។ នៅក្នុងបាល់ទាត់ មានរឿងប្លែកៗកើតឡើងជាច្រើន (momentum) អាចផ្លាស់ប្ដូរលទ្ធផលបានយ៉ាងលឿន។ 

ដូច្នេះ ការប្រកួតនេះគឺរំភើបណាស់ ព្រោះចន្លោះពិន្ទុរវាងក្រុមនីមួយៗ គឺប្រកៀកប្រកិតគ្នា។ តាមរយៈការគណនាផលសងគ្រាប់បាល់ (Goal Difference) , ប្រវត្តិជួបគ្នា (Head to head) និងលទ្ធផលប្រកួតផ្ទាល់ អាចកំណត់ថា ក្រុមណាអាចចូលរួមក្នុងវគ្គ៦ក្រុមខាងលើ (Top 6) និងធ្លាក់ទៅលេងក្រុម៥ក្រុមខាងក្រោម (Bottom 5)៕