នៅសល់តែ ២ថ្ងៃប៉ុណ្ណោះ ការប្រកួតដ៏ធំមួយនឹងចាប់ផ្តើមក្នុងពានរង្វាន់ AFC Challenge League ២០២៥-២០២៦ វគ្គពាក់កណ្ដាលផ្ដាច់ព្រ័ត្រ ជើងទី១ ដែលជាការជួបគ្នា រវាង ព្រះខ័នរាជស្វាយរៀង របស់ កម្ពុជា និង ម៉ានីឡា ឌីហ្គហ្គើរ មកពី ហ្វីលីពីន នៅថ្ងៃទី០៩ ខែមេសា ឆ្នាំ២០២៦ វេលាម៉ោង ៧:០០ នាទីយប់ នាពហុកីឡដ្ឋាន មរតកតេជោ ។

មុនជួបគ្នាវគ្គពាក់កណ្ដាលផ្ដាច់ព្រ័ត្រនេះ ព្រះខ័នរាជស្វាយរៀង ធ្លាប់ប្រកួតស្មើគ្នា ២ទល់២ ជាមួយ ម៉ានីឡា ឌីហ្គហ្គើរ រួចមកហើយក្នុងវគ្គសន្សំពិន្ទុក្នុងពូល D ។

ស្ថិតិ ៤ប្រកួត មុនការប្រកួតមកដល់របស់ក្រុមទាំង២ ក្នុងពានរង្វាន់ AFC Challenge League ល្អដូចគ្នា៖

 ស្វាយរៀង កំពុងបង្ហាញទម្រង់លេងយ៉ាងល្អក្នុងពានរង្វាន់ AFC Challenge League ដោយ

• ឈ្នះ Eztra 3-0
• ស្មើ Manila Digger FC 2-2
• ឈ្នះ ភ្នំពេញក្រោន 6-2 សរុបទាំង២ជើង ក្នុងវគ្គ៨ក្រុមចុងក្រោយ

ចំណែកឯ ម៉ានីឡា ឌីហ្គហ្គើរ វិញក៏មិនធម្មតាដែរ ដោយ

• ឈ្នះ SP Falcons 2-0
• ស្មើស្វាយរៀង 2-2
• ឈ្នះ Dewa United 3-2 សរុបទាំង២ជើង ក្នុងវគ្គ៨ក្រុមចុងក្រោយ

កាលពីជួបគ្នាលើកមុនយើងអាចឃើញថា ក្រុមទាំង២ប្រើទម្រង់លេងខុសគ្នា៖ ម៉ានីឡា ឌីហ្គហ្គើរ ប្រើប្រាស់ ទម្រង់ 4-3-3 លេងវាយសម្រុកខ្លាំង មានខ្សែប្រយុទ្ធ 3 នាក់ ដែលអាចបង្កសម្ពាធខ្ពស់ ដល់ ខ្សែការពារ ស្វាយរៀង ខណៈដែលស្វាយរៀង ប្រើប្រាស់ទម្រង់ 4-5-1 ផ្តោតលើការពារ និងគ្រប់គ្រងបាល់នៅតំបន់កណ្ដាល រួចលេងចេញពីជ្រុង។

គួរឱ្យដឹងដែរផងដែរថា នេះជាការប្រកួតសំខាន់បំផុតមួយដែលអាចកំណត់ថា តើក្រុមណានឹងឆ្ពោះទៅវគ្គផ្ដាច់ព្រ័ត្រ? ជើងទី១នេះ ព្រះខ័នរាជស្វាយរៀង មានប្រៀបក្នុងទឹកដី នឹងអ្នកគាំទ្រដ៏ច្រើន មុនជើងទី២ ដែលធ្វើឡើងនៅទឹកដីហ្វីលីពីនវិញ នាថ្ងៃទី១៦ ខែមេសា ឆ្នាំ២០២៦ ។

កុំភ្លេចនាំគ្នាទៅ ចូលរួមស្រែកហ៊ោ លើកទឹកចិត្ត ដល់ព្រះខ័នរាជស្វាយរៀង របស់កម្ពុជាយើងទាំងអស់គ្នា !