បន្ទាប់ពីបង្ហាញទម្រង់លេងដ៌ល្អជាបន្តបន្ទាប់ រយៈពេលមួយខែ កីឡាករ MIJLAND GUYTHO ត្រូវបានជ្រើសរើសជាកីឡាករល្អប្រចាំខែមេសា (Man of the Month) របស់ការប្រកួតជម្រើសជើងឯក ខេមបូឌានព្រីមៀរលីគ ឆ្នាំ២០២៥/២៦។

 
ក្នុងអំឡុងខែមេសា ខ្សែប្រយុទ្ធសញ្ជាតិហូឡង់រូបនេះ បានបង្ហាញខ្លួនចំនួន ៣ ប្រកួត និងចំណាយពេលលើទីលានសរុប ២៧៦ នាទី។ តាមរយៈការបង្ហាញសមត្ថភាពដ៏គួរឱ្យចាប់អារម្មណ៍ រូបគេអាចរកគ្រាប់បាល់បានចំនួន ៤ គ្រាប់ និងទទួលបានពានកីឡាករល្អប្រចាំការប្រកួត (Man of the Match) ចំនួន ២ លើក។ លើសពីនេះ រូបគេមិនបានទទួលកាតលឿង ឬកាតក្រហមណាមួយឡើយក្នុងអំឡុងពេលប្រកួតទាំងនេះ។

 
សម្រាប់លទ្ធផលការប្រកួតក្នុងខែមេសា ក្លឹបអង្គរថាយហ្គឺរ ទទួលបានជ័យជម្នះ ២ ប្រកួត និងបរាជ័យ ១ ប្រកួត ដោយបានយកឈ្នះលើក្លឹប បឹងកេត ក្នុងលទ្ធផល ២-០, ចាញ់ក្លឹប ភ្នំពេញក្រោន ក្នុងលទ្ធផល ០-២ និងយកឈ្នះលើក្លឹប ណាហ្គាវើលដ៍ ក្នុងលទ្ធផល៣-១។
 
គួរបញ្ជាក់ផងដែរថា គិតត្រឹមសប្ដាហ៍ទី៣១ នៃការប្រកួតជម្រើសជើងឯក ខេមបូឌានព្រីមៀរលីគ រដូវកាលឆ្នាំ២០២៥/២៦ កីឡាករ MIJLAND GUYTHO MARCUS RENEWICK វ័យ ២៩ ឆ្នាំ ដែលមានសញ្ជាតិហូឡង់ និងទើបចូលរួមជាមួយក្លឹប អង្គរថាយហ្គឺរ នៅរដូវកាលនេះ បានបង្ហាញខ្លួនសរុបចំនួន ២៨ ប្រកួត ក្នុងនោះចូលលេងជាកីឡាករបម្រុងចំនួន ៩ លើក។

 
មិនត្រឹមតែប៉ុណ្ណោះ រូបគេរកគ្រាប់បាល់បានចំនួន ១៣ គ្រាប់ និងបញ្ជូនបាល់ឱ្យមិត្តរួមក្រុមស៊ុតបញ្ចូលទីបានចំនួន ៦ លើក ព្រមទាំងឈ្នះពានកីឡាករល្អប្រចាំការប្រកួតសរុបចំនួន ៥ លើកផងដែរ។ ទម្រង់លេងដ៏ល្អរបស់រូបគេ កំពុងក្លាយជាកម្លាំងសំខាន់មួយសម្រាប់ក្លឹប អង្គរថាយហ្គឺរ ក្នុងរដូវកាលនេះ៕