ក្រុមហ៊ុនខេមបូឌានព្រីមៀរលីគ នឹងរៀបចំ ពិធីចាប់ឆ្នោតផ្លូវការ និងប្រកាសបើករដូវកាលខេមបូឌានព្រីមៀរលីគ ឆ្នាំ២០២៦/២៧ នៅថ្ងៃទី៣១ ខែកក្កដា ឆ្នាំ២០២៦ នៅនាយកដ្ឋានវិទ្យុ និងទូរទស្សន៍បាយ័ន (ស្ទូឌីយ៉ូស្ទឹងមានជ័យ) ចាប់ពីម៉ោង ១០:០០ ព្រឹកតទៅ។

ពិធីនេះនឹងមានការចូលរួមពីតំណាងក្លិបបាល់ទាត់ទាំង ១១ ដែលបានចុះឈ្មោះចូលរួមប្រកួតក្នុងរដូវកាល ២០២៦/២៧ រួមមាន៖ អង្គរថាយហ្គឺរ, បឹងកេត, អាយ អេស អាយ ដង្កោសែនជ័យ, គិរីវង់សុខសែនជ័យ, អឹម អូ អាយ កំពង់ដេវ៉ា, ណាហ្គាវើលដ៍, ភ្នំពេញក្រោន, ព្រះខ័នរាជស្វាយរៀង, កងយោធពលខេមរភូមិន្ទ, ឡាយហ្វ ខេត្តព្រះសីហនុ និងវិសាខា។ ពិធីនេះក៏នឹងមានការចូលរួមពីអ្នកសារព័ត៌មាន កីឡាករ មន្ត្រីប្រព័ន្ធផ្សព្វផ្សាយ និងអ្នកគាំទ្រជាច្រើនរូប ដើម្បីចូលរួមក្នុងព្រឹត្តិការណ៍ដ៏សំខាន់នេះ មុនពេលរដូវកាលថ្មីចាប់ផ្តើម ផងដែរ។

ក្នុងពិធីនេះ នឹងមានការបង្ហាញអំពី ពានផ្លូវការរបស់ខេមបូឌានព្រីមៀរលីគ សម្រាប់រដូវកាលថ្មី ព្រមទាំងការចាប់ឆ្នោតដើម្បីកំណត់កាលវិភាគប្រកួត និងការប្រកួតក្នុងសប្ដាហ៍ដំបូងនៃរដូវកាល ២០២៦/២៧។
ជាមួយគ្នានេះ កម្មវិធីក៏នឹងមានការប្រកាសកាលវិភាគប្រកួតផ្លូវការសម្រាប់រដូវកាលថ្មី ការបង្ហាញយុទ្ធនាការរដូវកាល ២០២៦/២៧ និងការប្រកាសព័ត៌មានសំខាន់ៗពាក់ព័ន្ធនឹងការប្រកួតខេមបូឌានព្រីមៀរលីគ រដូវកាលថ្មី។

គួរបញ្ជាក់ថា ការប្រកួតខេមបូឌានព្រីមៀរលីគ រដូវកាល ២០២៦/២៧ នឹងចាប់ផ្តើមនៅថ្ងៃទី៥ ខែកញ្ញា ឆ្នាំ២០២៦ ដោយមានក្លិបបាល់ទាត់ចំនួន ១១ ចូលរួមប្រកួតប្រជែងដណ្តើមជើងឯកក្នុងរដូវកាលថ្មីនេះ៕