ស្របតាមយុទ្ធនាការ CPL Cares ក្រោមប្រធានបទ «ហ៊ានចាប់ក្ដីស្រមៃ» ក្រុមហ៊ុនខេមបូឌានព្រីមៀរលីគ បានសហការជាមួយក្រុមហ៊ុន វៀតធេល ខេមបូឌា (Viettel (Cambodia) Pte., Ltd.) ដើម្បីចុះទៅកាន់ភូមិរង់ចាំ នៅថ្ងៃទី១៩ ខែវិច្ឆិកា ឆ្នាំ២០២៦ ខាងមុខនេះ ក្នុងគោលបំណងរៀបចំកម្មវិធី Football Clinic និងសួរសុខទុក្ខកុមារនៅក្នុងសហគមន៍ភូមិរង់ចាំ។ 

លោក Peter Koo នាយកគ្រប់គ្រងទូទៅនៃក្រុមហ៊ុនខេមបូឌានព្រីមៀរលីគ បានមានប្រសាសន៍ថា យុទ្ធនាការ CPL Cares ក្រោមប្រធានបទ «ហ៊ានចាប់ក្ដីស្រមៃ» ត្រូវបានរៀបចំឡើងក្នុងគោលបំណងផ្ដល់ជំនួយជាសម្ភារសិក្សា និងរៀបចំកម្មវិធី Football Clinic សម្រាប់កុមារ។
 
លោក Peter Koo បានមានប្រសាសន៍បន្ថែមថា តាមរយៈវិស័យបាល់ទាត់ យើងអាចបង្កើតផលវិជ្ជមានដល់សង្គម និងចូលរួមចំណែកក្នុងសកម្មភាពសង្គម តាមរយៈការលើកកម្ពស់ស្មារតីសាមគ្គីភាព ការចែករំលែក និងការយកចិត្តទុកដាក់ចំពោះសហគមន៍។ ជាពិសេស កម្មវិធី Football Clinic នឹងផ្ដល់ឱកាសដល់កុមារ និងយុវជនក្នុងការសិក្សា និងអនុវត្តជំនាញបាល់ទាត់ ព្រមទាំងជំរុញទឹកចិត្តឱ្យពួកគេមានភាពក្លាហានក្នុងការដេញតាមក្ដីស្រមៃរបស់ខ្លួនតាមរយៈវិស័យកីឡាបាល់ទាត់។

 
គួររំលឹកផងដែរថា កាលពីខែសីហា ឆ្នាំ២០២៥ កន្លងទៅ ក្រុមហ៊ុនខេមបូឌានព្រីមៀរលីគ ក៏បានចុះសួរសុខទុក្ខប្រជាពលរដ្ឋនៅក្នុងខេត្តឧត្តរមានជ័យ និងខេត្តសៀមរាប ដែលរងផលប៉ះពាល់ដោយសារបញ្ហាព្រំដែន ដោយបាននាំយកជំនួយជាស្បៀងអាហារ អង្ករ និងថវិកា ដើម្បីចូលរួមសម្រាលការលំបាករបស់ពលរដ្ឋផងដែរ។
 
ដូច្នោះ បងប្អូនទាំងអស់គ្នាអាចចូលរួមគាំទ្រយុទ្ធនាការ CPL Cares – ហ៊ានចាប់ក្ដីស្រមៃ តាមរយៈ QR Code ផ្លូវការរបស់ក្រុមហ៊ុនខេមបូឌានព្រីមៀរលីគផងដែរ៕​